पोखराको संस्थान क्षेत्रका संरचनामा डोजर, सडक चौडा गरिने

पोखरा। पृथ्वीचोकस्थित पोखरा बसपार्क अगाडिको संस्थान क्षेत्रमा अवैध रूपमा बनाइएका संरचना हटाउने काम सुरु गरिएको छ।

पोखरा उपत्यका नगर विकास समितिको मातहतमा रहेको जग्गामा विभिन्न राजनीतिक दल निकट मजदुर संगठन तथा संस्थाहरूले बनाएका संरचनामा डोजर चलाइएको हो। सहारा क्लब, हिमाली सांस्कृतिक परिवार र सामुदायिक प्रहरी सेवाका संरचना हटाउन थालिएको छ।

उक्त क्षेत्रमा ट्रेड युनियन तथा विभिन्न संस्थाले संरचना बनाएर भाडासमेत उठाउँदै आएको बताइएको छ। नेकपानिकट मजदुर संगठनले भने यसअघि नै अस्थायी संरचना हटाएर स्थायी संरचनाको चाबी सम्बन्धित निकायलाई बुझाइसकेको थियो।

हङकङ बजार अगाडिको संरचना हटाउनुअघि त्यहाँका व्यवसायीले रातिसम्म सामान उठाएर ठाउँ खाली गरेका थिए। सोही क्षेत्रमा सहारा क्लबले सञ्चालन गरेको सार्वजनिक शौचालयसमेत रहेको छ।

संरचना हटाउन अन्तिम पटक ३५ दिने सूचना जारी गरिएको थियो। उक्त सूचनाको म्याद जेठ ९ गते सकिएको थियो।

पोखरा महानगरपालिकाका मेयर धनराज आचार्यका अनुसार ती संरचना हटाएपछि सडक चौडा गरिनेछ।