चेन्नईमा दुर्घटनामा ज्यान गुमाएका अम्मर रैकालका परिवारलाई प्रवासी नेपालीद्वारा आर्थिक सहयोग

चेन्नई (तमिलनाडु), भारत। नेपाल सुदूरपश्चिम प्रदेश, कञ्चनपुर जिल्ला, पुनर्वास नगरपालिका-१०, भीम बस्ती सरस्वती टोल निवासी स्वर्गीय प्रशाद रैकालका कान्छा छोरा अम्मर रैकालको भारतको तमिलनाडुस्थित चेन्नईमा दुःखद निधन भएपछि प्रवासी नेपालीहरूले स्वस्फूर्त रूपमा आर्थिक सहयोग संकलन गरेका छन्।

सम्माननीय व्यक्तित्व मानबहादुर साउँद र मानबहादुर खड्काको नेतृत्वमा सञ्चालन गरिएको सहयोग अभियानमा चेन्नईमा रहेका नेपाली दाजुभाइ-दिदीबहिनीहरूले सक्रिय सहभागिता जनाएका थिए।

रोजगारीका सिलसिलामा चेन्नईको अम्मत्तुर क्षेत्रमा कार्यरत अम्मर रैकाल २०८३ असार १७ गते (१ जुलाई २०२६) रहस्यमय दुर्घटनामा परेका थिए। उपचारका क्रममा K.M.C. Hospital मा २०८३ असार २० गते (४ जुलाई २०२६, शनिबार) उनको निधन भएको खबरले सम्पूर्ण नेपाली समुदायलाई स्तब्ध र शोकाकुल बनाएको छ। दुर्घटनाको वास्तविक कारण हालसम्म खुल्न सकेको छैन। प्राप्त जानकारीअनुसार उनको शरीरको संवेदनशील भागमा गम्भीर चोट लागेको थियो।

मृतकको आर्थिक अवस्था कमजोर रहेको तथा परिवार गम्भीर समस्यामा परेको अवस्थालाई मध्यनजर गर्दै अन्तिम श्रद्धाञ्जलीमा सहभागी भएका प्रवासी नेपालीहरूले मानवीय भावनासहित स्वेच्छिक रूपमा आर्थिक सहयोग संकलन गरेका हुन्।

संकलित सहयोग रकममध्ये मृतकका दाजुलाई नेपाल फर्किन टिकट खर्चका लागि भारु ५,००० प्रदान गरिएको छ। बाँकी रकम मृतककी श्रीमतीको नाममा नेपाल पठाइने सहयोग संकलन समितिले जनाएको छ।

यस अभियानबाट कुल भारु ३५,१८० संकलन भएको छ। सहयोग गर्ने सम्पूर्ण दाताप्रति आयोजकहरूले हार्दिक आभार व्यक्त गर्दै कठिन परिस्थितिमा देखाएको एकता, सद्भाव र मानवीय सहयोगको उच्च प्रशंसा गरेका छन्।

मृतक अम्मर रैकालको आत्माले चिरशान्ति प्राप्त गरोस् तथा शोकसन्तप्त परिवारजनमा यो असह्य पीडा सहने धैर्य, शक्ति र साहस प्राप्त होस् भन्ने कामना गरिएको छ। साथै, दुःखको यस घडीमा प्रवासी नेपाली समुदायले देखाएको सहकार्य र मानवीय संवेदनाले सामाजिक एकताको प्रेरणादायी उदाहरण प्रस्तुत गरेको छ।