अबदेखि पूरा १४.२ केजी एलपी ग्यास सिलिन्डर बिक्री हुने ।

काठमाडौं । नेपाल आयल निगमले एलपी ग्यासको आपूर्ति तथा वितरण प्रणालीमा सुधार आएको भन्दै अबदेखि देशभर पुनः १४.२ केजी क्षमताको पूरा एलपी ग्यास सिलिन्डर बिक्री-वितरण गर्ने निर्णय गरेको छ। 

निगमले मंगलबार जारी गरेको प्रेस विज्ञप्तिअनुसार भारतीय आयलका विभिन्न बोटलिङ प्लान्ट तथा रिफाइनरीबाट ग्यास लोडिङ अवस्था सहज बन्दै गएको र उपभोक्ताबाट १४.२ केजी सिलिन्डरको उच्च माग रहेकाले अस्थायी रूपमा लागू गरिएको ७.१ केजी ग्यास भर्ने व्यवस्था हटाइएको हो। 

नयाँ व्यवस्थाअनुसार असार ३१ गतेदेखि देशभर १४.२ केजी ग्यास भरिएको सिलिन्डर साविककै रु. २,०६० मा बिक्री–वितरण हुनेछ। निगमले केही समयसम्म ७.१ केजी र १४.२ केजी दुवै प्रकारका सिलिन्डर बजारमा देखिन सक्ने भएकाले उपभोक्तालाई ग्यासको तौल र मूल्य यकिन गरेर मात्र खरिद गर्न आग्रह गरेको छ।

निगमले भारतीय आयल कर्पोरेशनबाट एलपी ग्यास नियमित रूपमा आयात भइरहेकाले आवश्यकताअनुसार मात्र ग्यास खरिद गर्न र अनावश्यक मौज्दात नगर्न पनि उपभोक्तासँग अनुरोध गरेको छ।