सन्दीप लामिछानेले बनाए एकदिवसीय क्रिकेटमा नयाँ विश्व कीर्तिमान

काठमाडाैं । नेपाली क्रिकेट टोलीका प्रमुख स्पिनर सन्दीप लामिछानेले एकदिवसीय अन्तर्राष्ट्रिय क्रिकेटमा नयाँ इतिहास रचेका छन्। स्कटल्याण्डविरुद्धको खेलमा दुई विकेट लिएसँगै उनले सबैभन्दा कम खेलमा १५० विकेट पूरा गर्ने विश्व कीर्तिमान कायम गरेका हुन्।

सन्दीपले यो उपलब्धि केवल ७३ एकदिवसीय खेलमा हासिल गरेका छन्। यसअघि सबैभन्दा छिटो १५० विकेट लिने कीर्तिमान अष्ट्रेलियाका तीव्र गतिका बलर मिचेल स्टार्कको नाममा थियो। स्टार्कले ७७ खेलमा उक्त उपलब्धि हासिल गरेका थिए।

त्यसैगरी, पाकिस्तानका सक्लिन मुस्ताकले ७८ खेल, अफगानिस्तानका राशिद खानले ८० खेल तथा न्यूजिल्याण्डका ट्रेन्ट बोल्टले ८१ खेलमा १५० विकेट पूरा गरेका थिए।

सन्दीपको नाममा यसअघि नै सबैभन्दा कम खेलमा १०० विकेट लिने कीर्तिमान पनि रहेको छ। उनले ४२ खेलमै १०० विकेट पूरा गरेका थिए। यो सूचीमा राशिद खान दोस्रो स्थानमा छन्, जसले ४४ खेलमा उक्त उपलब्धि हासिल गरेका थिए।

नेपाली क्रिकेटका स्टार खेलाडी सन्दीपको यो उपलब्धिलाई नेपाली क्रिकेट इतिहासकै महत्वपूर्ण क्षणका रूपमा हेरिएको छ।