राष्ट्रिय स्वतन्त्र पार्टी (रास्वपा) जोरायल गाउँपालिका, डोटीको प्रथम पालिका अधिवेशन भव्य रूपमा सम्पन्न

डोटी । राष्ट्रिय स्वतन्त्र पार्टी (रास्वपा) जोरायल गाउँपालिका, डोटीको प्रथम पालिका अधिवेशन भव्य रूपमा सम्पन्न भएको छ।  आइतबार सम्पन्न भएको अधिवेशनले निराजन बिष्टको नेतृत्वमा ११ सदस्यीय नयाँ पालिका कार्य समिति सर्वसम्मत रूपमा चयन गरेको छ।

अधिवेशनमा पार्टीका नेता, कार्यकर्ता, शुभेच्छुक तथा स्थानीय नागरिकहरूको उल्लेखनीय सहभागिता रहेको थियो। सहभागीहरूले राष्ट्रिय स्वतन्त्र पार्टीले अघि सारेको सुशासन, पारदर्शिता, जवाफदेहिता तथा नागरिक केन्द्रित राजनीतिक अभियानलाई गाउँपालिकास्तरसम्म थप सशक्त रूपमा विस्तार गर्नुपर्नेमा जोड दिएका थिए।

अधिवेशनबाट सभापतिमा निराजन बिष्ट, उपसभापतिमा गंगा देवी रावल, सचिवमा विनोद सिंह बोहरा तथा सह–सचिवमा नर बहादुर कपड्याल सर्वसम्मत रूपमा चयन भएका छन्। त्यसैगरी भोज बहादुर नेपाली, लक्ष्मी ओली, शंकरराज जोशी, लक्ष्मी कामी, गीता कपड्याल, निर्मला बिष्ट र डम्बर बहादुर शाहु सदस्यमा चयन भएका छन्।

नवनिर्वाचित सभापति निराजन बिष्टले अधिवेशनलाई सम्बोधन गर्दै पार्टीप्रति आम नागरिकले व्यक्त गरेको विश्वासलाई व्यवहारमा उतार्ने प्रतिबद्धता जनाए। उनले जोरायल गाउँपालिकाका नागरिकका समस्या, विकासका आवश्यकता र जनचाहनालाई केन्द्रमा राखेर संगठनलाई सक्रिय र प्रभावकारी बनाइने बताए। साथै युवाहरू, महिला तथा सबै समुदायको सहभागितालाई सुनिश्चित गर्दै पार्टीलाई गाउँ–गाउँसम्म विस्तार गरिने उल्लेख गरे।

अधिवेशनले संगठन सुदृढीकरण, सुशासन प्रवर्द्धन, भ्रष्टाचारविरुद्धको अभियान तथा जनताका आधारभूत आवश्यकता र अधिकारका पक्षमा दृढतापूर्वक उभिने संकल्पसमेत गरेको छ। सहभागीहरूले राष्ट्रिय स्वतन्त्र पार्टीप्रति बढ्दो जनआकर्षणलाई संगठित शक्तिमा रूपान्तरण गर्दै गाउँपालिकाभित्र नयाँ राजनीतिक संस्कार स्थापित गर्नुपर्ने आवश्यकता औँल्याएका थिए।

कार्यक्रममा बोल्ने वक्ताहरूले देशमा वैकल्पिक राजनीतिक शक्तिको आवश्यकता रहेको र राष्ट्रिय स्वतन्त्र पार्टीले नागरिकको आशा र अपेक्षालाई सम्बोधन गर्न महत्वपूर्ण भूमिका खेलिरहेको बताएका थिए। उनीहरूले नवगठित पालिका समितिलाई संगठन विस्तार, जनसम्पर्क वृद्धि तथा जनहितका मुद्दामा सक्रियतापूर्वक काम गर्न शुभकामना व्यक्त गरेका छन्।

अधिवेशन सफलतापूर्वक सम्पन्न भएसँगै जोरायल गाउँपालिकामा राष्ट्रिय स्वतन्त्र पार्टीको संगठनात्मक संरचना थप मजबुत बनेको विश्वास व्यक्त गरिएको छ। नवनिर्वाचित कार्य समितिले पार्टीको नीति, सिद्धान्त र उद्देश्यलाई स्थानीय तहसम्म प्रभावकारी रूपमा कार्यान्वयन गर्दै जनताको विश्वास जित्ने गरी काम गर्ने प्रतिबद्धता जनाएको छ।